У Полацку паставілі новыя ўязныя знакі. Усе на рускай мове

На выходных Полацку споўнілася 1 164 гады. Да Дня горада паставілі новыя ўязныя знакі. Паводле задумы ўладаў, яны павінны стаць не толькі паказальнікамі, але і своеасаблівай візітнай карткай найстаражытнейшага горада Беларусі. Аднак навінка выклікала сярод мясцовых жыхароў не толькі адабрэнне, але і крытыку.

Новыя ўязныя знакі выкананы на рускай мове — «Полоцк»

Як распавялі ў «Полацкім весніку», новыя канструкцыі з’явіліся на ключавых уездах у горад. Іх выканалі ў адзіным стылі, а кожны элемент дызайну, як сцвярджаецца, сімвалізуе сувязь пакаленняў, пераемнасць традыцый і багатую гісторыю Полацка. Аўтары праекта лічаць, што знакі павінны прыцягваць увагу турыстаў і падкрэсліваць унікальнасць горада.

Аднак пасля з’яўлення новых аб’ектаў частка палачанаў звярнула ўвагу не на дызайн, а на моўнае афармленне. Напрыклад, уязны знак з ладдзёй і годам заснавання горада выкананы на рускай мове — «Полоцк». Гэта выклікала пытанні ў некаторых жыхароў, якія лічаць, што для найстарэйшага горада краіны лагічней было б выкарыстоўваць беларускі варыянт назвы:

• «А беларуская мова, як было раней, ужо не ў трэндзе?»
• «Маглі б на беларускай, ці забыліся ўжо».

Іншыя каментатары лічаць, што ў горадзе ёсць праблемы, якія патрабуюць большай увагі, чым новыя ўязныя знакі:

• «Ну ў гэтым-та горадзе засталося яшчэ плітку ў цэнтры памяняць — і праблем няма».
• «Нудны горад гэта ніяк не палепшыла».

Новы надпіс «З Полацку пачаўся свет» без першай літары «З»

Акрамя таго, жыхары горада звярнулі ўвагу і на новы надпіс: «З Полацку пачаўся свет». Палачане заўважылі, што ў канструкцыі адсутнічала першая літара «З». Не выключана, што пасля гэты недахоп ужо выправілі. Відэа з выпраўленай версіяй пакуль не публікавалі. «Полацкі веснік» таксама пакуль маўчыць.

Такім чынам, новыя ўязныя знакі сталі адной з самых абмяркоўваемых гарадскіх навін апошніх дзён. Адны жыхары ўбачылі ў іх удалае ўпрыгожванне Полацка, іншыя — нагоду зноў падняць пытанне пра ролю беларускай мовы ў гарадской прасторы і прыярытэтах добраўпарадкавання.